Туршилтаар:

Маргаагүй атлаа нотлох баримт гаргуулах хүсэлт гаргасныг шүүх хүлээж авсангүй

“Х” ХХК-иас “Д” ХХК-д холбогдуулан зээлийн гэрээний үүрэгт 5,600,000 төгрөг гаргуулах, үүргийн гүйцэтгэлийг барьцаа хөрөнгөөр хангуулах тухай нэхэмжлэлийг шүүхэд гаргаса. “Д” ХХК-аас нэхэмжлэлийн шаардлагыг гардаж аваад уг шаардлагыг хүлээн зөвшөөрсөн эсхүл татгалзсан эсэх талаар хариу тайлбар болон нотлох баримтыг шүүхэд ирүүлээгүй байна.

Хариуцагч “Д” ХХК-аас нэхэмжлэлийн шаардлагад холбогдох тайлбар, татгалзлаа ирүүлээгүй атлаа нэхэмжлэгч компаниас нотлох баримт гаргуулах тухай хүсэлт гаргасныг шүүх хангахаас татгалзав.

Учир нь, нэхэмжлэлийн шаардлагыг хүлээн зөвшөөрсөн эсхүл татгалзаж байгаа эсэх талаарх байр сууриа илэрхийлээгүй тохиолдолд хариуцагчийн энэ хүсэлт нь юуг нотлох зорилготой эсэх нь тодорхойгүй, тухайн хэрэгт ач холбогдолтой ямар нөхцөл байдлыг, эсхүл нэхэмжлэлийн шаардлагыг хүлээн зөвшөөрөхгүй байгаа ямар үндэслэлээ нотлох зорилгоор гаргасан нь тодорхойгүй   гэж шүүхээс үзсэн байна. 

Санамж: Энэ хураангуй нь бүрэн гүйцэд шүүхийн шийдвэр биш бөгөөд түүнийг орлохгүй, зөвхөн шүүхийн шийдвэрийг олон нийтэд ойлгомжтой байдлаар мэдээлэх зорилготой болно.

Хураангүй бэлтгэсэн:  Баянгол дүүргийн Иргэний хэргийн анхан шатны шүүхийн шүүгч Х.Энхзаяа