Шүүхийн нэр: Баянгол дүүргийн Иргэний хэргийн анхан шатны шүүх

Шүүгчийн захирамжийн дугаар: 2023 оны 4 дүгээр сарын 4-ний өдрийн 102/ШЗ2023/06226  дугаар захирамж

Тоймын дугаар-05, огноо: 2023 оны 4 дүгээр сарын 12-ны өдөр

Шийдвэрийн төлөв: Хүчин төгөлдөр болсон

            Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.

Агуулга: Нэхэмжлэгч “ЖТ” ХХК нь хариуцагч Мөнхөд холбогдуулан 66,190,427 төгрөг гаргуулах тухай нэхэмжлэлийг шүүхэд гаргажээ.

Шүүхэд хариуцагч Мөнх нь нэхэмжлэгч “ЖТ” ХХК-ийн захирал Б-г гэрчээр оролцуулах тухай хүсэлт гаргасан байна.

Хэрэг хянан шийдвэрлэхэд ач холбогдол бүхий байдлыг мэдэж байгаа хэн ч гэрч байж болох ч шүүх Б-г гэрчээр оролцуулах тухай хариуцагч Мөнхийн гаргасан хүсэлтийг хангахаас татгалзаж шийдвэрлэсэн.

Учир нь Б нь нэхэмжлэгч “ЖТ” ХХК-ийг итгэмжлэлгүйгээр төлөөлөх эрх бүхий этгээд буюу зохигч болох нэхэмжлэгчийг шүүхэд төлөөлж буй этгээд юм.

Иргэний хэрэг шүүхэд хянан шийдвэрлэх тухай хуулийн 43 дугаар зүйлийн  43.8.1-т зааснаар үүргээ гүйцэтгэх замаар уг хэргийн байдлыг мэдэх болсон эвлэрүүлэн зуучлагч, зохигчийн төлөөлөгч буюу эрүүгийн хэргийн өмгөөлөгчийг гэрчээр дуудах буюу мэдүүлэг авч болохгүй.

Шүүхийн процессын тоймыг бэлтгэсэн: Баянгол дүүргийн Иргэний хэргийн анхан шатны шүүхийн шүүгч Б.Азбаяр