Шүүхийн нэр: Баянгол дүүргийн Иргэний хэргийн анхан шатны шүүх
Шүүгчийн захирамжийн дугаар: 2023 оны 3 дугаар сарын 21-ний өдрийн 102/ШЗ2023/05305 дугаар захирамж
Тоймын дугаар-06, огноо: 2023 оны 6 сарын 19-ний өдөр
Захирамжийн төлөв: Хүчин төгөлдөр болсон
Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.
Нэхэмжлэгч М нь О-оос гэрлэлт цуцлуулах тухай нэхэмжлэлдээ...бид 2009 онд гэрлэж 4 хүүхэд төрүүлсэн, 17 жилийн амьдрал, үр хүүхдээ бодож, түүнд буруу зүйл битгий тохиолдоосой гэж эмээсэн учир юу ч нэхэмжлэхгүй, 4 хүүхдээ аав дээр нь үлдээхийг хүсэж байна гэжээ.
Хуульд зааснаар гэрчлэгчдийн хэн нэгний байнгын хүчирхийлэл, дарамтаас болж гэр бүлийн гишүүдийн амь нас, эрүүл мэнд болон хүүхдийн хүмүүжилд ноцтой аюул, хор уршиг учирч болзошгүй, эсхүл учирсан нь тогтоогдсон бол гэрлэлт цуцлуулах тухай нэхэмжлэлийг шүүхэд гаргаж болно.

Харин бусад гэр бүлийн харилцаанаас үүссэн маргааныг шүүхээс гадуур урьдчилан шийдвэрлэх журмаар эвлэрүүлэн зуучлалд хандаж шийдвэрлүүлдэг.

Энэ журмыг зөрчиж шүүхэд нэхэмжлэл гаргасан тул М-ийн гэрлэлт цуцлуулах тухай нэхэмжлэлийг хүлээн авахаас татгалзсан байна.

Иймд нэхэмжлэгч нь шүүх дэх эвлэрүүлэн зуучлагчид урьдчилан хандаж, түүний дараа шүүхэд нэхэмжлэл гаргах эрхтэй болно.

Шүүхийн процессын тоймыг бэлтгэсэн: Баянгол дүүргийн Иргэний хэргийн анхан шатны шүүхийн шүүгч А.Зүмбэрэл